Konsultim publik projektligjit për menaxhimin e rezervave të naftës

Ministria e Infrastrukturës dhe Energjisë ka nisur konsultimin publik për projektligjin “Për krijimin, mbajtjen dhe menaxhimin e rezervave minimale të sigurisë të naftës bruto dhe nënprodukteve të saj” bazuar në ligjin “Për detyrimin e shërbimit publik”.

Lidhur me disa paqartësi që janë shprehur ditët e fundit në media, për parashikimet e këtij ligji dhe pasojat që mund të ketë ai në rritjen e çmimit të naftës në vend, MIE sqaron se:

Ligji “Për krijimin, mbajtjen dhe menaxhimin e rezervave minimale të sigurisë të naftës bruto dhe nënprodukteve të saj”, është një detyrim i padiskutueshëm i Qeverisë Shqiptare pasi është:

• Pjesë e kapitullit të 15 të paketës së MSA (Marrëveshja e Stabilizim Asocimit).
• Pjesë e matricës së masave të buta të procesit të Berlinit.
• Pjesë e paketës së tretë të energjisë.

Në ligjin ekzistues të rezervave të sigurisë, parashikohet që bizneset në disa forma duhet të kenë 90 ditë tregu rezervë sigurie.

Me çmimet e sotme të tregut, kjo rezervë sigurie është e përfshirë në kostot e tregtarëve, duke zënë minimumi 25% të kostove të produktit të blerë nga ana e tyre.

Ajo që propozohet në ligjin e ri është që kjo kosto të ulet, sepse në totalin e rezervës së sigurisë në nivel kombëtar mund të përfshihet edhe nafta bruto, deri në 50% të rezervës. Kjo do të thotë që kostot aktuale do të ulen me mbi tre herë për këtë pjesë (50% të sasisë aktuale).

Mënyra e operimit, e parashikuar në projektligj, duke qenë se përfshin naftën bruto, kostoja e së cilës është më shumë se 3 herë më e ulët, ul kostot e përgjithshme të bizneseve në sektorin e hidrokarbureve, subjekt këtij ligji me më shumë se 15%.