Bashkëbisedimi i ministrit Gjiknuri me gazetarët për Unazën e Madhe të Tiranës

Bashkëbisedimi i ministrit Gjiknuri me gazetarët për Unazën e Madhe të Tiranës

Së pari ju falenderoj për pjesëmarrjen në këtë bashkëbisedim,

Nisur nga informacionet e bëra publike në media, specifikisht ato të datës 6 Dhjetor në emisionin të “PaEkspozuarit” në News 24, në cilësinë e Ministrit të Infrastrukturës dhe Energjisë udhëzova menjëherë ARRSH dhe çdo institucion tjetër në varësi apo të fushës së mbulimit të MIE, që nëse ka kontrata me kompaninë DH Albania, të fillojë menjëherë procedurat e pezullimit dhe marrjen e masave për verifikimin e dokumentacionit të kësaj kompanie.

Konkretisht, ARRSH pasi pezulloi punimet dhe zbatimin e kontratës për lotin e parë të Unazës së Madhe të Tiranës segmenti Pallati me Shigjeta – Sheshi Shqiponja, ju drejtua zyrtarisht Ministrisë së Infrastrukturës dhe Energjisë për të ndihmuar komunikimin me autoritetet amerikane në lidhje me verifikimin e pretendimeve të ngritura.

Në datën 7 Dhjetor, i jam drejtuar zyrtarisht me shkresë ambasadës amerikane, seksionit ekonomik-politik si dhe kam kontaktuar me kërkesën time përfaqësues të lartë të ambasadës në zyrën time, me synim lehtësimin e verifikimit sa më të shpejtë të dokumentacionit të kësaj kompanie. Të njëjtën gjë kemi kërkuar edhe në rrugë diplomatike, përmes ambasadës së Republikës së Shqipërisë në Uashington.

Nga konfirmimet e mbërritura nga institucionet e sipër përmendura rezulton se një pjesë e dokumentacionit të paraqitur nga kompania DH Albania në procedurat e tenderit është i falsifikuar.

Pas marrjes së këtij konfirmimi nga SHBA, ARRSH  ka zgjidhur menjëherë kontratën në fjalë dhe do të fillojë procedurat për sekuestrimin e garancisë financiare në vlerën 10% të kontratës.

Materialet e ardhura nga SHBA do ti referohen Prokurorisë e cila tashmë ka hapur një hetim për falsifikimin e dokumenteve zyrtare nga kompania DH Albania. Të njëjtën praktikë ka ndjekur edhe Operatori i Sistemit të Transmetimit.

Dua të siguroj qytetarët se deri më tani nuk rezulton të jetë shkaktuar asnjë dëm ekonomik për Buxhetin e Shtetit.

Dua të theksoj se falsifikimi i dokumenteve rezulton të jetë filluar jashtë territorit të Shqipërisë. Siguroj opinionin publik se hapat e ndjekura nga ARRSH për kryerjen e procedurës për tenderim kanë qenë në përputhje me legjislacionin në fuqi për prokurimin publik. Edhe oferta e paraqitur nga kompania në fjalë, në mënyrë elektronike, ka qenë në përputhje me kërkesat e dokumentave te tenderit që njeh legjislacioni.

Legjislacioni në fuqi nuk kërkon verifikimin e informacionit të ofertuesve, përveç rasteve specifike, kur ka dyshime të arsyeshme për të dhëna të rreme. Pra, ARRSH nuk e ka patur te detyrueshme ligjërisht dhe  asnjë dyshim te arsyeshëm që të kërkonte verifikim të këtij dokumentacioni.

Nisur nga problematikat e hasura në këto procedura me kompani të huaja apo përfaqësi të tyre, unë sot kam propozuar ndryshime në aktet ligjore dhe nënligjore te Ligjit mbi Prokurimin Publik.

Kam propozuar që të sanksionohet qartësisht në ligj, detyrimi që ofertuesit fitues ti verifikohet në çdo rast informacioni që vetdeklaron përpara lidhjes së kontratës. Propozimi i është drejtuar zyrtarisht Agjencisë së Prokurimit Publik, për të inicuar këto ndryshime ligjore. Kjo do të vlejë në të ardhmen për parandalimin e situatave të ngjashme dhe do ti bëjë autoritetet më të kujdesshme në verifikimin e informacioneve përpara lidhjes së kontratës.

Qëndrimi ynë ka qenë plotësisht në përputhje me ligjin dhe praktikat më të mira qeverisëse pasi që në momentin e parë që u vumë në dijeni të këtij rasti, ne kemi pezulluar kontratat dhe kërkuar verifikim të menjëhershëm për dokumentacionin e kompanisë DH Albania.

Ky është një ndryshim thelbësor nga sjelljet e qeverive të mëparshme, të cilat për raste të ngjashme kanë zgjedhur të mos mbrojnë interesat e shtetit. Mjafton tu kujtoj rastin e famshëm të privatizimit të Albpetrolit, ku kompania që e privatizoi paraqiti një garanci false prej 87 milion USD dhe qeveria e asaj kohe nuk bëri asgjë për të sekuestruar këtë shumë, duke shkaktuar dëme kolosale Buxhetit të Shtetit.

Nga ana tjetër, duhet kuptuar se çdo akt falsifikimi i kryer nga kompanitë që marrin pjesë në gara publike dëmton institucionet publike dhe imazhin e tyre.

Përgjegjësia direkte bie mbi ata të cilët kanë marrë përsipër të bëjnë këtë falsifikim. Unë inkurajoj me forcën më të madhe prokurorinë ta hetojë këtë çështje deri në fund, për të zbuluar kush janë autorët e vërtetë të këtij falsifikimi dhe ata që fshihen prapa tij.

Dua të garantoj se ARRSH dhe çdo institucion tjetër do të bashkëpunojë ngushtësisht me organet e drejtësisë për të vënë në dispozicion çdo informacion për zbardhjen e të vërtetës.

Patjetër, edhe unë si ministër dhe drejtuesit e institucioneve të prekura nga ky falsifikim do të reflektojmë duke nxjerrë dhe përgjegjësitë tona administrative përkatëse. Në momentin kur prokuroria e shtetit do të gjejë përfshirjen e qoftë edhe një zyrtari të vetëm që ka ndihmuar apo bashkëpunuar në këtë falsifikim, kushdoqoftë ai, nga më i ulëti e deri tek unë, do të përgjigjet përpara ligjit.

Përsa i përket akuzave se prapa kësaj shoqërie fshihet Damian Gjiknuri po deklaroj me përgjegjësinë time të plotë si ministër, si deputet dhe si qytetar se nuk kam patur asnjë lidhje dhe as dijeni rreth këtij aktiviteti kriminal të kryer nga kjo kompani.

Është fat i mirë që siç jeni në dijeni, në SHBA ka filluar një hetim penal për këtë rast. Mirëpresim rezultatet e hetimeve në Shqipëri dhe në Shtetet e Bashkuara të Amerikës dhe nuk besoj se opozita do mund të akuzojë drejtësinë amerikane ashtu sikurse rëndom bën me drejtësinë shqiptare.

Dua të garantoj qytetarët e Tiranës se projekti i zhvillimit të Unazës së Madhe do të vazhdojë pa u ndalur për tu përmbyllur brenda afateve. Menjëherë, Autoriteti Rrugor Shqiptar do të shpallë procedurën e garës për lotin 1 të Unazës së Madhe.

 

Pyetje-përgjigjet me gazetarët:

Pyetje: Z.Ministër, ju hodhët poshtë të gjitha lidhjet me kompaninë DH Albania, ndërkohë që opozita ju ka akuzuar se në kohën kur është krijuar kjo kompani ju keni qenë në SHBA. Si është e vërteta?

Ministri Gjiknuri: Po, unë kam qenë në Shtetet e Bashkuara të Amerikës në periudhën mos gaboj 25 deri në 29 qershor. Kam qenë aty në vizitë zyrtare, i ftuar nga Sekretari Perri i Energjisë në konferencën botërore të gazit dhe kam patur takime me zyrtarë të lartë të administratës së Shteteve të Bashkuara të Amerikës, Sekretarin Perry, Sekretarin Pompeo dhe shumë zyrtarë të tjerë të lartë të Departamentit të Shtetit. Vizita ime është publike dhe e gjitha është një rekord publik që gjithkush mund ti referohet. Këto më duken akuza qesharake, për të bërë lidhje të tilla. Është njësoj si të them unë: meqenëse Monika Kryemadhi ka qenë në atë periudhë në Amerikë në datën 25 Qershor, madje në Uashington, ajo ka vajtur me qëllim për të hapur ndonjë kompani. Apo të them meqë Lulzim Basha shkon shpesh në Holandë dhe kompani holandeze mund të qëllojnë edhe të përfshira në afera, kanë lidhje me të. Pra, këto janë akuza krejt banale. Unë thashë, për fat të mirë në SHBA po bëhen hetime dhe le ti shkohet të vërtetës deri në fund. Pavarësisht se nuk do të thotë asgjë të jesh në një shtet, unë po them se nëse unë kam shkelur në shtetin Delaware gjatë periudhës që unë kam qenë në Amerikë, për këtë jam gati të jap dorëheqjen. Nëqoftëse kam qenë në atë shtet, jam gati të jap dorëheqjen. Ama këta që bëjnë akuza të tilla, në të kundërt duhet të kërkojnë një falje të madhe publike.

Pyetje: Z.Ministër, ju thatë që në përgjigjen zyrtare që ka dërguar SHBA, një pjesë e dokumentacionit rezulton e falsifikuar. Cili prej dokumentacioneve, pra kemi të bëjmë me bilancet e falsifikuara, me vulën e noterit, me firmën e sekretarit të shtetit të Delaware. Mund ta dimë?

Ministri Gjiknuri: Për ato që kam marrë unë nga regjistrat tregtare të Shteteve të Bashkuara, një pjesë e bilanceve dhe e të dhënave që janë aty (unë nuk dua ti bëj të gjitha publike sepse kjo është një çështje në hetim), janë të prodhuara në mënyrë të falsifikuar. Patjetër, mund të ketë shumë dokumente të tjera, gjë për të cilën unë nuk e pata mundësinë për periudhën e shkurtër, sepse në fund të fundit mua më intereson që të mbroj interesat e shtetit nga pikëpamja civile dhe financiare. Për të gjitha këto materiale, jam i bindur që Prokuroria nëpërmjet letër porosisë do ti drejtohet autoriteteve dhe gjithçka do të zbardhet, qoftë kush është aksionerë, si është krijuar kompania, kush ka qenë atje. Gjithçka zbardhet dhe shumë shpejt publiku do të mësojë të vërtetën. E them edhe njëherë, nëqoftëse ka ndonjë përfshirje të zyrtarëve shqiptarë përgjegjësia do të jetë e jona. Gjithçka tjetër i takon atij që ka bërë falsifikimin.

Pyetje: Juve keni dyshime kush është prapa kompanisë?

Ministri Gjiknuri: Patjetër që duhet të jetë pas kompanisë një njeri që ka patur interesa ekonomike për të bërë biznes por unë nuk mund të vë gishtin se kush është prapa kompanisë. Janë disa emra aty, prokuroria ka mundësi ti hetojë, do ti thërrasë, do të marrë masat e saj. Unë nuk jam këtu të gjykoj punën e prokurorisë. Jam i bindur që këto gjëra dalin, nuk mund të jenë sekret.

Pyetje: Po për dy lotët e tjera keni sigurinë për dokumentacionin që janë të sakta?

Ministri Gjiknuri: Ministria Infrastrukturës dhe Energjisë nuk është ajo që bën procedura tenderimi, dokumentacioni është atje publik, patjetër që media ka të drejtë të hedh dritë mbi procedurat dhe mesa di, i gjithë dokumentacioni i të tre loteve do të shkojë në një proces hetimor nga ana e prokurorisë. Prokuroria ka hapur hetimin nisur edhe nga një pjesë e akuzave të opozitës për të gjithë projektin. Kështu që dhe nga kjo pikëpamje do të dalin të vërtetat nëse ka të tilla.

Pyetje: Z.Gjiknuri doja të dija, nga dokumentet që ju keni, nga cilat persona është bërë firmosja e kontratës si në rastin e  rrugës Unaza e Re, si në rastin e tenderit me OST-në.  Cilët janë emrat e tjerë që dalin. Këtu cilët persona e kanë përfaqësuar këtë kompani përveç Avdjol Dobit?

Ministri Gjiknuri: Nga informacionet që kam në kontratë është firmosur nga administratori i shoqërisë që është Avdjol Dobi. Pra, ai ka patur tagrin për të firmosur kontratën e fituar nëpërmjet këtij tenderi. Mesa di, në të dyja rastet. Megjithatë, ju mund ti drejtoheni institucioneve përkatëse edhe për kopje të dokumentacionit. Unë jam konsultuar vet, nuk e kam këtu se do t’ua bëja publike.  Por, meqenëse ministria nuk është ajo që bën procedurat e tenderit duhet të kuptojmë dhe roli i Ministrit në këtë rast është i pozicionit të mbikëqyrjes politike të procesit sepse janë të gjitha institucionet e varësisë ato që kanë përgjegjësinë dhe të drejtën për të organizuar procedura tenderimi, për të lidhur kontrata, për të zbatuar punime dhe jo ministria.

Pyetje: Mesa jeni ju në dijeni, licencat që ka paraqitur kjo kompani sepse të paktën sipas njoftimit të ARRSH-së ajo paska licencën G, pra nga 32 punime ndërtimi që bëjnë në gjithë botën, kjo e bën në 30. Këto licenca janë njehsuar këtu, apo kanë qenë me vulë apostile?

Ministri Gjiknuri: Këtu e kam edhe dokumentacionin për licencën. Njohja e licencave të kompanive të huaja që hapin aktivitet në Shqipëri bëhet sipas një procedure të përcaktuar nga vendimi i Këshillit të Ministrave ku ka një set kriteresh. Unë nxora disa raste të disa kompanive të huaja që janë licencuar dhe kjo nuk ka bërë përjashtim nga natyra e dokumentacionit të paraqitur. Gjatë këtij vitit janë dhënë nga 7-8 licenca për kompani të huaja të cilat kanë paraqitur dokumentacion dhe ka një komision të pavarur ku ministri nuk ka rol atje. Nga informacionet që kam marrë, dokumentacioni është siç kërkohet në vendimin e Këshillit të Ministrave. Natyrshëm, pas daljes së këtyre fakteve kam kërkuar edhe nga komisioni i licencimit që të kryhen procedurat e nevojshme për heqjen e licencave dhe kallëzimin e materialeve në prokurori.

Pyetje: Pra është bërë një njësim i licencës?

Ministri Gjiknuri: Nga informacioni që kam dhe nga raporti që më është bërë, dokumentacioni nga Amerika ka ardhur me vulë apostile, me deklarime, me përkthime, me deklarime të noterit amerikan dhe me verifikim të noterit shqiptar. Pra, nga pikëpamja e dokumentacionit aty është bërë një falsifikim. Përmbajtja nuk ekziston por forma ka qenë korrekte.  Pse ndodhi? Thashë këto ndodhin, nuk është rasti i parë, shpeshherë shoqëritë e huaja apo dhe shqiptare ka ndodhur që kanë sjellë dokumentacion të falsifikuar, qoftë edhe me vula zyrtare. Shkoni në APP, shikoni sa raste të ngjashme ka në Shqipëri me raste të falsifikimit të dokumenteve me procedurat e tenderit.

Pyetje: Ju thatë se mund të nisnit verifikimet sipas ligjit ekzistues vetëm kur ka dyshime të arsyeshme. Pra, nuk kishit dyshime të arsyeshme për faktin që në garën për Unazën e Re në 3 lotet u fut një kompani fantazmë që nuk dorëzoi asnjë dokument dhe kjo kompani në lotin e parë e cila fitoi ishte një kompanie krijuar në Korrik të këtij viti, që kishte si fytyrë vetëm një 26 vjeçar. Nuk është dyshim i arsyeshëm ky që ti besohet një kompanie të tillë që vjen vetëm për 3 muaj, askush nuk ja ka dëgjuar emrin dhe të jepen 30 milionë euro?

Ministri Gjiknuri: Ajo është paraqitur me dokumentacion zyrtar dhe entitetin juridik të kompanisë unë dua ta ndaj nga përfaqësuesi. Procedurat e tenderimit nuk janë organizuar nga kjo ministri, kështu unë nuk e kisha informacionin e nevojshëm në lidhje me detajet e ofertës. Kompanitë gjykohen nga dokumentacioni dhe nga personaliteti juridik që kanë, pavarësisht se kush ka qenë përfaqësues i kompanisë. Fakti që ka qenë një ofertë nuk është hera e parë dhe unë e kam thënë edhe herë tjetër, legjislacioni i prokurimit publik i bazuar në direktivat europiane thotë këtë procedurë dhe kjo është për ta verifikuar nëse është i mirë apo i keq. Hajde ta ndryshojmë ligjin. Ligji thotë që mjafton një ofertë e vetme të jetë në përputhje dhe brenda fondit limit dhe është e pranuar. Kështu që ky është ligji. Nuk mund të refuzosh pse ka një ofertë. Tenderi në Shqipëri fitohet në bazë të dokumentacionit të dorëzuar në mënyrë elektronike. Duhet të kuptoni një gjë, se ju kujtoni se u fitua tenderi dhe ikën lekët. Garancia e shtetit është kontrata dhe sigurimi i kontratës. Kompanitë konkurrojnë në bazë të kredencave të tyre. Kjo është krejt normale ku plus-minus mund të jenë nga më të ndryshmet si mund të vlerësohen, por kuptohet në bazë të kritereve. Ajo që është garanci për kontratën është sigurimi kontratës. Në punimet civile paraja paguhet pasi është bërë situacioni punimeve dhe certifikuar nga supervizor. Është si në jetën e përditshme, do të thotë dikush unë mund ta bëj diçka. Do ti thuhet dakord fillo bëje, në momentin që dorëzon mallin apo punimin unë do të jap paratë. Kështu funksionon edhe në ndërtim. Pra, bëhet punimi dhe dorëzohet situacioni.

 Pyetje: Tendera kaq të rëndësishëm me vlera kaq të mëdha nuk ka një klasifikim kompanish që duhet të marrin pjesë?

Ministri Gjiknuri: Kompanitë që kanë dorëzuar oferta i kanë plotësuar të gjitha kriteret që plotësojnë të gjithë, përfshirë edhe kjo nga ana formale por është ndërtuar me një gjë të rreme që doli më vonë. Kjo është e vërteta.

Pyetje: A nuk ka qenë një fakt i arsyeshëm fakti që në bilancin e kompanisë nuk kishte asnjë emër konkret të punimeve që firma kishte bërë. Ndërkohë që në bilancin e kompanive të tjera ka emra konkretë ku është rreziku u fluksit të parasë, cila kompani ka borxh dhe për një financier apo kontabilist me shumë pak eksperiencë mund të kapej që ai bilanci  ishte fallso?

 Ministri Gjiknuri: Unë nuk i di këto, si kam analizuar pjesën e bilanceve dhe për këtë mund të drejtoheni tek autoriteti kontraktor. Dokumentacioni i kërkuar në tender ka qenë i plotë nga ana formale por ka qenë i falsifikuar, përfshirë edhe bilancet të cilat aty kanë dhënë natyrën e punimeve, flukset financiare e të gjitha të tjerat si këto. E thashë, e keqja mund të ndodhë, falsifikime ka patur edhe më parë. Ndryshimi është si reagon dhe a i është shkaktuar dëm shtetit. Shtetit nuk i është shkaktuar asnjë dëm financiar. Pse? U pengua në kohë, nuk është harxhuar asnjë para nga Buxheti i Shtetit dhe procedura do të rihapet dhe do të ribëhet nga e para. Patjetër nuk është mirë kjo që ndodhi. Nuk është rasti i parë, është tjetër gjë për shkak të vëmendjes politike kjo po futet në lupë se po ti ktheheni historisë ka shumë e shumë raste në të kaluarën.

Rasti i Albpetrolit është rast skandaloz që për një procedurë me 1 miliard dollarë nuk u mor asnjë masë. Ke patur dhe raste të tjera, kujto rastet e Fazlliçit me blerjen e tokave me kompani off shore dhe aty me dokumenta të falsifikuara e me shumë e shumë raste të tjera. Ka ndodhur në Pentagon ku u morën 300 milionë dollarë nga dy djem në Florida, krijuan një kompani dhe morën 300 milionë dollarë. Ndodhin! E keqja ndodh. Problemi është si reagon ti, atje në Amerikë u dhanë edhe paratë për të blerë ato armë. Në shtetin më serioz të botës. Falsifikimi është mashtrim, njerëzit mund të mashtrohen edhe për blerjen e pronësisë, njerëzit mund të mashtrohen për shumë gjëra. Ne jemi të dëmtuar dhe ne do ti shkojmë deri në fund. Do të kërkojmë dëmtim civil, do kërkojmë ndjekje penale, do kërkojmë gjithçka. Qoftë nëse një zyrtar shqiptar ka qenë në bashkëpunim e ka pasur dijeni patjetër përgjegjësia do të jetë edhe për ta, përfshirë edhe për mua. Nëqoftëse unë kam patur dijeni, kam pasur informacion, patjetër mbaj përgjegjësinë time në të gjitha drejtimet.

Pyetje: Ju thatë që falsifikimi është kryer në një shtet tjetër dhe jo në Shqipëri. Nga verifikimi i dokumenteve depozituar në QKB rezulton që përkthimi i dokumentit të klasifikuar është kryer nga një person i cili nuk disponon as vulë dhe as nipt i cili është një detyrim ligjor për ta noterizuar përkthimin. Praktikisht, me një shikim të lirë lë të kuptosh që edhe ky dokument nuk është autentik  dhe minimalisht personi që ka kryer përkthimin nuk është i regjistruar në Qendrën Kombëtare të Biznesit!

Ministri Gjiknuri: Kjo çështje po hetohet, unë thashë origjina e falsifikimi ka filluar jashtë Shqipërisë. Patjetër që ai është proces në vazhdim dhe kjo është pjesë e falsifikimit. Ky është një proces në hetim, ka filluar në SHBA, ka vazhduar mbase edhe këtu. Unë këtë po them. Kushdo zyrtar qoftë edhe përkthyes apo noter ata do të përgjigjen përpara ligjit. Nuk më takon mua, sepse unë nuk e di zinxhirin e të gjitha vendimmarrjeve që mund të jenë.

Pyetje: Fondi limit për garën që do të rihapet, do të rishikohet…?

Ministri Gjiknuri: Akuzat e opozitës për fryrje të projektit janë akuza absurde. Projekti është transparent, është me zëra. Projekti ka zëra, ka volume, ka dizajn. Si nuk del një teknik nga opozita dhe të thotë po këtu kjo është fiktive. Në projektet e ndërtimit vlerat janë aty sepse ndërtimi është aty. Kemi të bëjmë me një autostradë jo vetëm 3 korsi herë dy, por janë edhe 4 korsi të tjera rrugë paralele dhe mbi të gjitha ka vepra inxhinierike mbikalime dhe nënkalime. Përsa i përket projektit, është nga projektet më të mira. Jemi të bindur që do të jetë nga veprat më të mira publike të realizuara përsa i përket transportit rrugor dhe projekti është i plotë. Akuzat janë thjesht për të hedhur numra dhe shifra për të nxitur kundërshtimin e këtij projekti. Kështu që ajo është një çështje shumë teknike. Le të dalin ekspertë ta kundërshtojnë vlerën e projektit dhe jo të flasin do vjedhin këta 40 milionë thua se nuk do u bëka fare investimi. Domethënë gjëra absurde që asnjë nuk i beson.

Pyetje: A ka pasur firmë nënkontraktore kjo kompani?

Nuk kam informacion, ju mund ti drejtoheni Autoritetit Rrugor Shqiptar për të marrë të gjitha të dhënat në lidhje me kontratën.

 Pyetje: Ju thatë që nuk ka një efekt në Buxhetin e Shtetit…

Ministri Gjiknuri:  E para duhet ti drejtoheni Autoritetit Rrugor. Së dyti ne duhet të jemi të lumtur që këtu nuk ka një pagesë paradhënie. Kjo është shumë e rëndësishme dhe për këtë duhet të jemi të gjithë shumë të kënaqur. E rëndësishme është që asnjë dëm nuk është shkaktuar, përkundrazi ne do të zhdëmtohemi edhe civilisht për këtë mashtrim të kryer sepse është një dëm që na është bërë ne si shtet. Autoritetet shqiptare janë më të dëmtuara në këtë rast, ashtu siç edhe qytetarët patjetër. Ne do të bëjmë çmos që ti sekuestrojmë këto para, ato garanci financiare të cilat janë paraqitur. Do të sekuestrojmë çfarë të mundemi dhe këto para do të shkojnë në dobi të interesit publik.

Pyetje: Paratë e garancisë do të derdhen në favor të ARRSH-së?

Ministri Gjiknuri: Në dijeni është 10% e vlerës, duhet të jetë një instrument sigurimi financiar që bllokohet në favor të autoritetit kontraktor në rast të dështimit të kontratës apo kur dështon kontraktori. Në këtë rast kemi të bëjmë me një personalitet fals juridik të kontraktorit gjë që është tipik shkak për sekuestrimin e kësaj vlere,

Pyetje: Po në rastin e tenderit të OST-së, ka garanci kontrate?

Ministri Gjiknuri: Patjetër të gjitha kontratat publike kanë garanci. Informacionet e tjera mund ti merrni pranë OST-së, po kontratat publike të gjitha kanë garanci, kanë instrument garancie.

Pyetje: Do veprohet njësoj edhe me OST-në?

Ministri Gjiknuri: Patjetër. Çdo reagim i joni do të jetë po e përmbledh kallëzim në prokurori, vënie në dispozicion çdo dokumentacion prokurorisë, sekuestrim i çdo të drejtë financiare në dobi të shtetit dhe dalja e përgjegjësisë deri në fund, përfshirë çdo njeri të përfshirë në të. Jam i bindur që hetimi këtu apo atje do ta nxjerrë vërtet kush janë, sepse shoqëritë në fund të fundit përbehen nga njerëz konkretë. Njerëzit konkretë do të hetohen dhe jam i bindur që e vërteta do të dalë dhe do të kuptoni që autoritet shqiptare kanë bërë detyrën e tyre.

 Pyetje: Do të jepni dorëheqjen në rast se rezulton që ndonjë zyrtar është i përfshirë?

Ministri Gjiknuri: Unë e thashë sipas zinxhirit të përgjegjësive. Nëse unë kam përgjegjësi, patjetër përgjegjësia politike është përgjegjësi politike por nëse vërtet në mënyrë sistemike veprimet e institucionit kanë çuar në këtë që ka ndodhur patjetër që unë do të shoh përgjegjësitë e mia. Por, në kushtet që jemi, me dijeninë që kam dhe me masat e marra nuk ndjej asnjë përgjegjësi të karakterit rëndesë sepse kam bërë detyrën. Në momentin e parë që kam marrë informacion, kam reaguar. Ju kujtohet atëherë për Albpetrolin, kishte 6 muaj që thoshin për garanci, më thoni një veprim që bëri qeveria Berisha atëherë?! Mori njeri në dorë përgjegjësi, bëri ndonjë veprim?! Më vonë u kujtuan të bëjnë kërkesa për sekuestrimin e asaj garancie e cila nuk ekzistonte fare dhe vetëm mbas një viti e ca kanë bërë një kallëzim penal. Madje se kanë bëra as ata vetë, por e ka filluar kryesisht prokuroria. Dallimi jonë është shumë i qartë nga të tjerët.

Pyetje: Këto garancitë janë të siguruara këtu në Shqipëri, është bërë ngrirja në Shqipëri apo janë jashtë shtetit?

Ministri Gjiknuri: Janë bërë në Shqipëri se kontratat janë lidhur në Shqipëri. Megjithatë e thashë për çdo informacion të mëtejshëm zyrtar mund ti drejtoheni me shkrim, ato informacione që jepen dhe që nuk mund të dëmtojnë hetimin patjetër mund të merren nga autoritetet të cilët kanë lidhur kontratën dhe kanë zhvilluar procedurat e tenderit.